春臨大地

儘管仲係好涷,但春天已俏俏來到,花兒都急不及待開始綻放.我其實冇乜點留意,只係憑直覺就去附近嘉道理農場,諗住慢慢影,過個悠閒的一天,點知…………嘩,超多人,仲未開門已經排到打蛇餅.好彩今日係星期日,有加班車,否則山都上唔到.

到輪到我第一班車已經爆滿,第二班要等二十分鐘,襯住有空檔四周行吓,原來山下都有唔錯既梅花喎,開得好密,但天色就麻麻,藍天做背景就冇喇,又驚開腳架太大龍鳳陣間趕唔切上車,求其影張.

嘉道理有義務導遊跟車,一般係會停幾個站講解吓,但佢好醒目見個個立晒架生,似去影相,就問吓中途站有冇人落,唔係懶,因為天氣涷再加上勁多架生,好迫,一上一落真係要好多時間的.佢咁問即刻有人答想直剷山頂,合晒荷呎.不過咁,有人想落的話都可以叫落.中途就有人見到梅花好靚落車.山頂前一個站司機提我地落車,鐘花櫻桃就係裏面,無謂上山頂再行落來,真係滿開喎,唔怪得咁多人啦,我見到有兩班攝影班.

天氣唔好,影大景好似冇乜色彩,就影吓特寫.平時影特寫我鐘意用微距鏡,但今日暗之餘好大風,有腳架都冇用,都係影wide小小冇咁震,搞咗好耐先終於影到一張唔震.

磨爛席都冇用,行低小小希望冇咁大風,最多影吓其他花囉.呢種原來叫做可愛花,靚就唔係好靚,亦都好多係枯咗,不過冇乜風可以慢慢影,畫面有翻應有既銳利度.

去到山腰見好多人圍住棵大梅花影,啲花係好密,而且斜路既關係,可以搵後面受正光既樹做背景,出到綠底,唔駛又係花就白晒,但背景黑媽媽,哈哈,怪俠一支梅.

再影wide小小,可惜一wide背景就花,但係開大光圈前景又矇晒,算啦,世事無完美.

不受人注意的小黃花,但我又覺得都幾靚………….瘦田冇人耕,一陣間又變咗好多人等住影 @@

話咁快又落到山腳準備走,咦,門口啲菊花都唔錯喎.背景都幾夠遠,散景該不錯.不過,一影好黑,這是淺色花常遇問題,但有閃燈就搞掂,日光日白要用到1/2輸出先平衡到光暗.