用開既LumiQuest 閃燈柔光咭效果算唔錯.但佢有個好大缺點係裝唔穏.原本有幾個黐實既魔術貼應該會幾好,但咁支燈就裝唔到其它配件,要專配佢用,另一個方案就用嗰條一啲彈力都冇既橡筋魔術貼.呢個亦係我既方案.結果就係好易甩,我已經試過幾次行行吓唔見咗,好彩行翻轉頭都執得翻.終於,去深圳影車展就執唔翻,冇咗.
因為呢個原因,唔想再買翻佢.事實上佢一啲都唔平,一塊咁既膠要成三百幾蚊.上網搵咗一輪,見呢隻MagMod意念幾好.超勁橡筋肯定點都唔會甩.之後所有配件都係靠磁石黐上去,唔駛裝餐死.要拆就咁一拉就掂,但又不至於輕到俾人抆走咗都唔知.
底座及反光罩兩件加埋仲貴過LumiQuest,接近五百.有柔光波及反光罩揀,價錢都係一樣,睇咗測試反光罩效果較好就揀佢.條橡筋超緊,手都震晒先裝得到上支閃光燈度.再用磁石加埋個柔光罩外型真係頗嚇人,唔打得都睇得.
個磁石設計真係幾好架,個罩共有四粒磁石成正方形,影直度時只要一拉一轉,又可以向翻前,唔駛申到冇雷公咁遠.
不過,不過,哎呀呀,實在太足料喇,兩件嘢加埋成噸重.橫度既話影完一睇相就垂頭,我第一時間諗到好似影直度支燈向內屈既方法,冇錯係唔會垂頭,但支燈夾硬頂住真係驚佢隨時爆較,一攞上身就好驚.
罷了,就算幾貴既嘢,唔好用都係等於廢物,要貢獻堆填區,走去鴨記睇吓,呢塊只售28蚊既閃燈反光板竟然幾合我心意,橡筋夠緊,輕身唔會垂頭,又唔阻相機袋地方,效果可能冇貴嘢咁好,直度又冇得轉方向,咁都竟然有興趣,唔怪得我老婆成日話我係乜骨頭 @@
真麻煩,Word press無端端改版又搞到放唔到大相,下期會搬翻去Blogspot,儘管回覆有問題.
http://bresson-hk.blogspot.hk/
mokphilip 
我一向都認為貴嘢不一定好(當然也不一定差)最緊要啱自己用，性價比高。
這個教訓真昂貴 😦
哈哈, 比老婆話乜骨頭@@@,
鴨記有時都有便靚正既野架。搵日我都去買條快門線+ 閃光燈, 你有無好介紹呀?
快門線最好講明係Canon 6D用既.我初初唔知道會有咁分,因為Sony得一種,但我同事Nikon D80用既不能用在D650,要再買過.
閃燈最好梗係買Canon 600EX RT啦,火力夠,有TTL,內建無線引閃,輔助對焦燈支援所有機種的所有對焦點,燈頭變焦去到200mm,可以在主燈控制子燈,唔駛因光暗問題走來走去.不過要二千幾蚊,玩飛燈的話要買兩支.次一級可以買Canon 430EX III RT,平幾舊但火力細啲,輔助對焦燈支援的對焦點不祥,不過閃燈顏色filter係膠売,耐用過600的膠片.
看看以下筆者心得
http://www.twom.com.tw/new-article/140109/w.htm
平啲可以考慮CactusRF60.千幾蚊.不過冇TTL,所有輸出要自己較,冇懶人模式,同埋冇跟顏色filter,要另外搵.
http://wlcreative.com/blog/%e7%84%a1%e5%9c%8b%e7%95%8c%e9%a3%9b%e7%87%88-cactus-v6-rf60-%e7%94%a8%e5%be%8c%e6%84%9f/
再平就買永諾啦,幾百蚊支,我都唔知點分型號喇,到時問吧.但要飛燈就要加舊嘢,未必有高速閃. 同埋冇跟顏色filter,要另外搵.
多謝島兄比資訊。
別客氣 😉
心心只覺得，，，能夠就地取材已是靈活的攝影達人，，，那怕只是一張白咭或一塊薄紗布！
哈哈,我仲未有咁高手 😛
島先生是否之後會行2個Blog呀？
應該唔會喇,除非呢度可以搞得到放大相.
哈哈! 叠埋成層樓咁高, 騎樓又大.
咪係囉,支閃燈邊頂得順 @@
幾時都係不論平貴，最重要係合心好用！……搬啦！大哥！….:)
我已經搬咗去Blogspot喇.