由於這裏不能夠放大相,將會搬去
搬遷啓事
6
中招柔光罩
用開既LumiQuest 閃燈柔光咭效果算唔錯.但佢有個好大缺點係裝唔穏.原本有幾個黐實既魔術貼應該會幾好,但咁支燈就裝唔到其它配件,要專配佢用,另一個方案就用嗰條一啲彈力都冇既橡筋魔術貼.呢個亦係我既方案.結果就係好易甩,我已經試過幾次行行吓唔見咗,好彩行翻轉頭都執得翻.終於,去深圳影車展就執唔翻,冇咗.
因為呢個原因,唔想再買翻佢.事實上佢一啲都唔平,一塊咁既膠要成三百幾蚊.上網搵咗一輪,見呢隻MagMod意念幾好.超勁橡筋肯定點都唔會甩.之後所有配件都係靠磁石黐上去,唔駛裝餐死.要拆就咁一拉就掂,但又不至於輕到俾人抆走咗都唔知.
底座及反光罩兩件加埋仲貴過LumiQuest,接近五百.有柔光波及反光罩揀,價錢都係一樣,睇咗測試反光罩效果較好就揀佢.條橡筋超緊,手都震晒先裝得到上支閃光燈度.再用磁石加埋個柔光罩外型真係頗嚇人,唔打得都睇得.
個磁石設計真係幾好架,個罩共有四粒磁石成正方形,影直度時只要一拉一轉,又可以向翻前,唔駛申到冇雷公咁遠.
不過,不過,哎呀呀,實在太足料喇,兩件嘢加埋成噸重.橫度既話影完一睇相就垂頭,我第一時間諗到好似影直度支燈向內屈既方法,冇錯係唔會垂頭,但支燈夾硬頂住真係驚佢隨時爆較,一攞上身就好驚.
罷了,就算幾貴既嘢,唔好用都係等於廢物,要貢獻堆填區,走去鴨記睇吓,呢塊只售28蚊既閃燈反光板竟然幾合我心意,橡筋夠緊,輕身唔會垂頭,又唔阻相機袋地方,效果可能冇貴嘢咁好,直度又冇得轉方向,咁都竟然有興趣,唔怪得我老婆成日話我係乜骨頭 @@
真麻煩,Word press無端端改版又搞到放唔到大相,下期會搬翻去Blogspot,儘管回覆有問題.
http://bresson-hk.blogspot.hk/
長洲攝影
朋友話想去影青衣油庫,雖然我去過但再去多次都冇所謂啦,約多一位網友,一切準備就緒點知佢就甩底.咁既然想去嗰個都唔去喇,咁就改地方啦.之前我都有諗過去長洲的,落雨搞到去唔到,正好補翻.
目的地是叫做北眺亭的地方,一點都唔難搵,一出碼頭就有路牌.一個鐘都唔駛就到,景觀同想像中有出入.本來諗住可以影晒成個東灣,配合啲屋仔應該好正,可惜山高度不夠,而且亭所在位置有樹阻擋,唯有先試試由樹中間空隙用長鏡特寫一忽先.還可以,陣間真係冇位就來呢度影.
之後沿住樓梯行出啲就可以冇阻咁見到東灣,山高度唔係好夠,而且越出高度越低,長洲變成一條線,取個平衡呢對情侶坐既位置似乎最好,陣間做電燈炟都冇計要在佢地旁邊影喇,依家先搵佢地做model 😛
呢個方向冇日落,只好靜待夜景.影晒成個東灣唔靚,就只影一忽,估唔到長洲啲屋係咁密的.天涼有埋海風一啲都唔熱,加上好快天黑唔駛咁夜走.
橫掂有長鏡,同一個位影多張特寫就可以收工.真係大意完全冇留意船期,去到幾乎閂大閘咁滯,好彩趕得及,否則可能要等多一粒鐘唔知做乜.最後要多謝網友介紹咁好食既芒果糯米糍.
又最後,好心wordpress就唔好學Yahoo啦,無端端又搞upgrade,對位難都算,啲相又唔識放大,無奈.
影人也夾相
我份人口味比較古怪,唔係太喜歡背暗灰灰黑黑咁的.所以會有用閃光燈補背景光,又或者特登背光再用閃光燈捕主體既怪異行為.但影人活動嘛,就要就翻大眾口味,尤其好多自然光派,喜歡主體受光,咁都冇壞既,但只有一個光源既時候,物體本身反光度就決定咗佢在相中既光暗.試過有次竟然安排着白色婚紗既model曬正陽光.背後原本都唔係好光既樹林即時變咗幾近全黑.可能有人覺得特別.不過就唔啱我呢啲食古不化既人囉………
呢個位構圖我覺得都唔錯架,如果model在樹陰下而出面又陽光普照既話.可惜陰天model曝光足夠但對面嗰堆樹都仲幾暗吓.嗰度光啲就好.決定搞搞佢.
Set腳架影兩張太麻煩喇,而且會阻住其他人既時間.由於堆樹只係暗小小,我亦唔係用好高iso影,就咁推光一級質量都唔會好差.可以見到堆樹夠光時,model已經爆晒光.
最後就係好似影風景咁合成,兩張疊埋一齊再擦走樹嗰部份就搞掂,由於堆樹離model好遠吓,而交接位又唔係淨色,可以話冇乜難度,而事實上我將樹幹離得較開既部份都加光咗.
再試啲難度比較高既,今次既景物黐住model.幸好背景唔算太黑,但我仍然預推高一級.推太小冇意思.
原來都唔係想像中咁難,起碼比風景相容易.只推光一級計,擦過小小其實唔多覺.我知道有啲軟件在raw格式已經可以直接用筆擦加光減光,不過要慳錢就唯有搵執Jpeg軟件一雞兩食囉 😛
迫死人Hallowen
上年8點左右已經迫到行都行唔郁,今年早啲去希望襯冇咁多人既時候有得影吓.
早咗係冇咁迫,不過都冇乜鬼喎.淨係得啲細路仔扮……超級英雄,蜘蛛俠,黑武士,巴斯光年都有,就係冇鬼.我地話可能係慳錢買件百搭衫就算,直到差唔多6點(官方開始時間),太陽落山,暗暗地就開始有鬼出現.個樣真的頗嚇人,不過啲人驚得來係笑既.
喂,交啲戲好喎,大家好似一家人影合照咁………
小朋友就醒喇,一見鏡頭就俾足表情.
靚女女鬼梗係要影.原來狗係唔驚鬼架 😛
有人問我啲鬼係咪企定定俾你影,因為夜晚好難有高速快門.其實係既,郁嗰啲夾硬影都唔靚啦,一見佢地唔郁就要狂影,呢隻鬼好搞鬼,扮晒唔郁,突然間衝前嚇人,搞到啲人依嘩鬼叫.
呢兩位大哥,Hallowen喎,細路哥就話冇預算啫,你地做乜咁慳皮架 @@
噢,大頭鬼夠晒搶鏡,但係佢算灟咗個重量同穏固度,我見到佢不停都要扶正個頭.
這女鬼最落力,不停俾POSE,可惜佢啲POSE太快,我跟本影唔掂.我發覺支Sigma 18-35雖然好sharp,但係對焦比較飄,有時對啱位都唔中,要移小小對多幾次見到sharp先OK,所以搞到我成個阿伯咁好慢手腳.啲鬼又冇乜耐性定鏡,有時都被迫一對就影,唔中至算.
大會可能驚冇人扮鬼,安排咗啲工作人員陪大家影合照.不停有人要影,相機影完手機都要影埋,真真正正係鬼死咁忙,哈哈 😛
上年都見過差唔多既組合.
睇翻個鐘7點半都未夠,但仲多人過上年8點,不停俾身邊既人羣推到企都企唔穏,係時候要走,臨走前影埋大合照先,實在冇法子迫到去正面,求其影算啦.嘩,落到去見到蛇餅已經過咗港鉄站,有好多鬼依家先來,冇本事影佢地喇.朋友問我做乜仲唔收相機,其實我有諗過途中見到鬼可以影吓.最後本住唔好阻塞道路既理由,都係冇影添.見到有朋友真係全部相都係影人龍,睇怕佢都係遲來直情放棄入去喇.
影吊車
想影昂平吊車又唔想低抄的話有兩個方法,其一係去搭一轉吊車,咁就可以由吊車裏面影附近既吊車,仲可以帶唔同既景,居過臨下又得,擦身而過又得.但係就幾貴囉,同埋要隔住玻璃影,對我此等孤寒鬼來講,另一個方法就係出賣勞力,行上山影喇.
啲人又係講到好易,經東澳古道去第一個吊車站,大把時間等日落.可是用眼望都知東涌站行去吊車站有幾高啦.唔係東涌站旁邊嗰個喎.之不過………..為咗影吊車大頭,除咗必備既wide鏡外,我仲帶咗70-200mm同埋………200-500mm.真係重到想死.行咗個幾鐘,踏上無數梯級,終於到吊車站,亦係同昂平棧道既交接處.非常近距離,可以同吊車裏面既人揮手.
可以影吓兩架吊車擦身而過.
身處高位,仲可以望到遠處既機場,從剛才既相睇到背景煙霞其實係超大的.無論肉眼或者影出來都係白茫茫一片.事後用軟件將contrast同clarity推到爆燈先見到啲飛機,前面堆草直情變到髮菜咁黑,終於又要夾相,最後偏色都係搞唔掂 @@
來到主菜,其實只係得一個位可以對正啲吊車,思考一吓,我要有背景,要見到吊車站,吊車又要看到比較大架,以上全是廢話,啲車點行全是很有規律的,可以做既就係zoom啱個焦距影.
要影到架吊車好大有兩個方法,一係等佢走埋來,咁有兩個問題,要影車底又或者佢同其他車大細差好遠,這個就是我要帶20-500mm既理由,透過長焦距壓縮拍到成堆車.
又到差唔多日落既時間,咸疍黃就冇喇,有都影唔到,我都冇帶腳架.求其影張好耐冇影過既剪影.行翻落山又個幾鐘,對腳痛咗幾日 😛
縮皮深圳車展
深圳電玩動漫節及車展係同時舉行的,一日睇晒會太趕,所以我分多日來,代價就係要俾多一轉來回車錢啦.好奇怪,上年票價要60人仔,今年竟然減價到40.有啲不祥預感……
要在咁多攤位中突圍而出吸引啲人埋來睇,埋來揀.大鑼大鼓係一個幾有效方法,尤其有表演.各位參觀者,XX汽車既表演將會喺5分鐘後開始.我又幾鐘意咁喎,唔駛好似傻仔咁見冇人就等定,都唔知幾時先有,甚至係冇.好緊張呀,開始喇…有冇搞錯呀,迪迪尼咩?搵啲咁嘢搞.仲要啲燈淨係照後面,最前既就黑媽媽,開閃燈狂閃先可以洩我心頭之恨呀.
要影翻吓靚女先可以平靜下來,唔係話崇洋, 洋妞通常係比較有質素啲.今日好小咋,多數都係國產,不過就咁企喺度冇乜pose都幾悶,影小小就算.
真人表演都唔好得幾多,好多都係就咁開大喇叭,搵幾個model出來行行企企,好似時裝表演咁就算,慳水慳力.反正之後都會俾人近距離影,實在冇乜必要排頭位,唯一好處係可以影到多過一個model,同背景唔駛咁多人囉.
地方淺窄,求其兩架車中間有小小位又開表演,哎呀,近到想影晒全身都唔夠wide,睇怕可以攞支魚眼來玩都得 😛
呢隊仲騎呢,都費事加圍欄,就咁行出空地就來,旁邊仲有人飲緊咖啡 @@
嘩,乜事咁多人,迫埋去睇吓乜事先.原來有鬼妹呀,仲一次過出足5個.今日真係冇乜外援.點都要諗辦法影張正面先.想zoom小小都冇法子做得到,用到最wide仲要低抄既結果就係咁啦 😦
好似都冇乜好影,周圍巡巡就走,上次見到呢個唔知有乜用,原來係不倒翁原理,個女仔向前就會跌落來派傳單派紀念品,拗拗腰就會上翻去.呀…..真係收賣人命,咁搞法做兩更分分鐘腰骨有事喎.
深圳電玩動漫節
第一屆錯過咗,今次睇吓有乜影.
會場都唔算太慳皮,有幾多大公仔擺設,嘩,咁大個Mark 44一定要影低佢先得.時間尚早,等咗一陣終於等到冇人阻住.不過….咦,圓眼既?原來係老翻,算啦,好過冇.
呢幾個就像真得多,最衰條紅色圍欄,唔影埋佢兩邊啲公仔會冇咗小小,唔想古怪比例最多只可以做到咁.好彩時間仲早冇乜人,晏啲想影正中間都唔駛旨意.但係………其實有冇版權架?
影完公仔,又係時候影吓真人,有咁多用心打扮,會擺pose,又歡迎拍照的model係要呢啲場合先至有.早早地未有太多人,背景還不至於太混亂.
哈哈,咁長頭髮既女警追賊會唔會好唔方便? 😛
上次去動漫展既舞台節目好精彩的,有cosplayer開片,呢次淨係得啲人玩遊戲,又或者跳吓舞咁,仲要坐低擔高頭影,唔多掂.
晏咗開始人多,呢隊人好誇張,十幾人着晒日本古裝,有啲仲踩埋高轎,十足十迪迪尼遊行咁,連睇熱鬧既人都自動自覺讓路俾佢地行.香港就好難見到啲咁大陣像既.
背景越來越花,嘗試以低角度避開人羣,可惜天花板其實一樣好花,但呢位model表情好特別,照影.
仲搵到個位背景係冇人,恐怕影埋呢個位都要走喇.
柳暗花明又一村,原來有人自己帶架生來搭背景,雖然只係兩支燈架再加一支棍同白紙,但純白色既背景已經令人好感動,更難得係佢地唔介意其他人埋去黐來影.分甘同味,真係要俾個like.
我唔一定淨影靚女架,男生效果好我都影的,哈哈…….如果係靚女梗係更好啦 😛
折子戲攝影
朋友有辦法搞到攝影證可以入後台影花粹,之後仲可以影埋表演又幾得意喎.
呀,其實後台係冇乜嘢好影,只係好似代妝室咁有啲有燈有鏡既枱,有助理幫手咁囉,不過環境未見過,體驗吓都好既.
影演出先係主菜,之前影大戲都係街場多,抵抄角度麻麻,今次可以攞正牌喺劇院觀眾席影,水平得多,先前都擔心M行會唔會太遠,帶定支200-500mm去,好彩最終唔駛用,否則失敗率高之餘相會粗好多.
大戲啲衫真係勁靚,但動作就………好多時都係兩支柱咁楝喺度唱就算,仲要隔到鬼咁開,要影晒兩個人就好細粒.所以兩個人一走埋啲就會聽全部機一齊連拍咁滯.
唔知粵劇同折子戲其實係有乜分別既呢?呢幕有場戲扮落大雨,有閃電燈光效果,都算冇咁齋.
正呀,終於有啲開片畫面.個個都狂影.
仲有經典Fing水髮,引來全場掌聲,似乎大家都係鐘意動感多過齋聽 😛
估到是甚麽戲嗎?成場都咸苦咸忽的,就係梁祝喇.
原本話影到10點,我計過大約半個鐘一場戲,已經10點,仲有兩場戲,即係起碼11點先完,唔理咁多啦,呢場影多陣點都要走,陣間冇車翻屋企就大鑊.好彩都係齋唱多,冇乜打交,唔係忍唔住照影都唔定.
樣樣齊跆拳道比賽
經歷咗唔完整既田徑賽,去影咗呢個乜都有啲既另類比賽.
全部參賽者都係小朋友,有精彩動作出現既機會唔大,不過就有頗多有別於一般淨搏擊既項目,開幕禮之後就來個集體操熱吓身先.
之後由會長級人馬表演手刀碎大石,仲要係一次碎四件,嘩,真係想知啲石究竟係乜物料咁化學 😛
嘩,正呀,唔用護甲既搏擊,真係未見過,不過………其實只係套路,即係預先夾定,做戲咁做架咋,點都好,佢係比賽項目,有評判睇動作完成度俾分的.
正規搏擊比賽當然有,係最主要項目,最多人參加,所以,每場比賽時間係………一分鐘,冇錯,只係得一分鐘,唔小心失分先分分鐘冇時間追而飲恨,不過參賽者好似唔多在乎,冇乜打隠陣波,都係狂抽多,好奇怪,以往見既比賽多數係唔用手,只用腳的,反而佢地好鐘意用手喎.
除咗搏擊仲會有乜項目呢?仲有呢個起飛腳踢柀,呢項主要係試踢高度既能力,唔計力量,塊柀係一踢就反的.
竟然有跳繩咁奇怪?其實係好似精武門李小龍嗰吓飛腳咁,跳過繩再踢反一塊柀,可惜….幾乎冇人做得到,最後係降低要求,過繩就算@@.至於影嘛,真係好難,跳遠已經難,仲要係室內.F1.8, iso 1250, 1/320秒快門基本上唔夠快.這時腦海內浮現一次朋友遇上同樣情況時既說話……等我搵支85mm,用F1>>>>>>>>>.4(賭聖口吻)來影佢.真係好型,等我又試吓,iso推到1600,部機既極限,開盡F1.4,快門升到1/640秒,算係夠快,但對焦勁難,最後都有三成成功率喎,算係唔錯.
最後既項目係用手或腳破柀,塊柀結構好特別係可以重用的.用手劈既影唔到,有四個評判圍住,用腳都仲有小小空隙.一踢碎晒之後仲要擺個好型既架式咁先為完滿的,否則會扣分.細細聲講你知,有啲運動員表情好肉緊,但係一踢落去塊柀冇事真係好好笑,我幾乎笑咗出來 😛
mokphilip 