搬遷啓事

由於這裏不能夠放大相,將會搬去

http://bresson-hk.blogspot.hk/

長洲攝影

朋友話想去影青衣油庫,雖然我去過但再去多次都冇所謂啦,約多一位網友,一切準備就緒點知佢就甩底.咁既然想去嗰個都唔去喇,咁就改地方啦.之前我都有諗過去長洲的,落雨搞到去唔到,正好補翻.

目的地是叫做北眺亭的地方,一點都唔難搵,一出碼頭就有路牌.一個鐘都唔駛就到,景觀同想像中有出入.本來諗住可以影晒成個東灣,配合啲屋仔應該好正,可惜山高度不夠,而且亭所在位置有樹阻擋,唯有先試試由樹中間空隙用長鏡特寫一忽先.還可以,陣間真係冇位就來呢度影.

之後沿住樓梯行出啲就可以冇阻咁見到東灣,山高度唔係好夠,而且越出高度越低,長洲變成一條線,取個平衡呢對情侶坐既位置似乎最好,陣間做電燈炟都冇計要在佢地旁邊影喇,依家先搵佢地做model 😛

呢個方向冇日落,只好靜待夜景.影晒成個東灣唔靚,就只影一忽,估唔到長洲啲屋係咁密的.天涼有埋海風一啲都唔熱,加上好快天黑唔駛咁夜走.

橫掂有長鏡,同一個位影多張特寫就可以收工.真係大意完全冇留意船期,去到幾乎閂大閘咁滯,好彩趕得及,否則可能要等多一粒鐘唔知做乜.最後要多謝網友介紹咁好食既芒果糯米糍.

又最後,好心wordpress就唔好學Yahoo啦,無端端又搞upgrade,對位難都算,啲相又唔識放大,無奈.

 

 

單輪車賽攝影

有呢個未影過既比賽添,唔知係點既呢,去睇吓先 🙂

原來係小朋友向的,個個都係人仔,睇怕比賽唔會好激烈,不過應該幾可愛既,可愛………….即係唔慌快囉.由於驚蝦碌行錯線,主持係會帶賽手步行一次路線先既,哎呀…..有啲好兒嬉既感覺@@

人仔冇我諗得咁多,行到差唔到終點已經鬥快跑,都唔知幾投入,一啲比賽壓力都冇.

大家留心唔好掛住玩喇,準備起步,由於係單輪停定平衡唔到,所以係有幾條柱俾賽手扶住的.

得單輪確實係比較慢,我估跑步會快過佢,但就好考平衡,哈哈,連架車都係粉紅色多,可愛搭夠.

男子組就比較快啲,當中帶頭既零舍大咗一個碼,實力都好明顯係高啲.

比賽失手係唔扣分既,只要唔阻到人,自已執翻起架車再行過就得,不過好意外,失手只係好小數.

賽道係用好多都幾高吓既綠色欄間開的,除咗幾個正面位,影場中間會遮咗個碌.

終於搵到個位可以影埋碌,玩吓慢快門,由於佢地好慢吓,所以pan唔到甚麼效果,好在都勉強見到兩架車,叫做知道係比賽緊,話咁快賽事就完晒,可以收工食午飯.

深圳動漫展

上次睇車展時間表時無意見到原來深圳都有動漫展.一於去睇睇同香港有乜唔同先.

我揀咗平日去諗住冇咁多人,咦,真係冇乜人喎,買票同入場都幾乎唔駛排隊.入到去就知道除咗啲賣嘢既單位之外,係乜都未開始的.賣既都係啲唔等洗物件,雖然都係有啲刀刀劍劍,公仔之類,但就都唔知係乜名堂的,要絶世好劍,乜乜限量版就冇喇.賣像真公仔既都未開,鉄甲威龍都未開射燈,好在我自己有,冇嘢做影吓公仔囉.

賣嘢飲既地方擺咗個好大既超變金剛,呀……….唔好意思見過隻翻版玩具係咁寫,佢個樣又真係唔多似係變型金剛,不過坦白講都做得幾靚既.

睇翻個節目表,11點鐘主舞台有cosplay預選.諗住早啲霸個好位啦.10點15分都冇乜人喎.咦,原來仲可以俾30蚊人仔入去裏面坐,不過45分鐘都唔係好耐啫,企頭位可能仲冇裏面坐咁阻.不過……….11點觀眾席只係得幾個人,一點都沒有開場的徵兆,唉,通常都梗係要遲小小架喇,忍耐一陣,不過等等等……..又等等等.後面越來越多人,又等等等.個屏幕播埋晒啲廢片,觀眾席越來越多人,又等等等,最後竟然係離譜到一點鐘先開場.累我硬企咗2小時45分鐘.開場並唔係見慣見熟既cosplay,而係古裝舞.

又係古裝舞,不停fing衫袖,都幾有動感既,不過就同預想會睇到既有啲唔同囉.

之後終於有cosplay表演,不過有啲隊伍……啲衫咁齋都夠膽上來比賽既,分分鐘台下面俾人影相既cosplayer仲華麗過佢地.好彩都有啲比較落本既,聽講呢隊在台灣好出名的,但我就覺得個做型都幾娘吓,就咁企喺度冇乜氣勢,影舞台就係想影佢地開片 😛

跟住係一連幾隊既美少女集體舞,夠晒熱鬧,不過最失敗係個屏幕會將現場放大同步播放,咁多人跳舞疊埋一齊,真係花到乜都睇唔到,有啲頭暈想嘔.

諗住跟住落去都會係羣舞,點知又有隻揪睇,呢隊正呀,成堆人都係玩開片,影得好開心,不過真係開始有啲腳軟同埋肚痛,已經企咗五個鐘有多,仲要未食午餐,水都攞唔到來飲,因為啲人啲袋已經擺晒上我個袋上面.而且我仲要去影出面既cosplay,想繼續但無奈都要離開.

呢度影cosplayer既地方比會展大好多,而且亦較光猛,不過都係難逃背景超多人既問題.點都好啦,既然來咗就影吓,哈,一次影夠兩個.

呵呵

影影吓發覺想背景乾淨最好既方法就係高度,用地下做背景.但咁影又冇乜氣勢,都係求其影吓就算.搞搞吓又成五點,襯住未全世界走人嗱嗱聲撤退.點知地鉄已經開始封出口,要行個大圈先入到去.

 

面對現實

隨住年紀增長,漸漸發覺近視好似深咗.睇遠嘢唔係好清,但同時睇近嘢又好似唔多清.似係老花.於是走去驗吓眼.

先生,你右眼既近視冇深到,但左眼就深咗.仲當場做咗個測試,遮住左眼果然睇遠係清咗,原來左眼一路干擾住我,但係睇近就變咗遮住右眼先清.雖然呢個係一個可以同時刻服近視同老花既方法,不過咁搞法對眼唔知會變成點……咁不如糾正翻左眼既度數先啦,但睇近景就要除眼鏡.好彩你老花唔係好勁,仲未駛配老花鏡.

咁唔係好方便喎.我第一時間諗到影相睇mon要除眼鏡.咁呀,不如配漸變鏡啦.望上面睇遠,望下面就睇近,不過價錢會貴幾多同埋要時間適應.而且唔可以配太細鏡片,因為其實係兩副眼鏡擺埋一齊,我地都係戴漸變鏡的,做嘢邊有時間又戴又除.咁又好似幾好喎,用錢搞得掂就用錢啦(好多有錢人都鐘意咁).而且佢講既動作應該唔難做.咁就唔駛除咗眼鏡又顧唔到遠景.細個成人笑人地啲眼鏡做乜有兩截,估唔到依家自己都要戴,不過科技進步,已經同普通眼鏡外觀冇分別.

終於配好,頭兩吓真係好正,望遠兩隻眼啱晒冇咗重影,張卡片好近都睇到.不過…………個店員叫我小心落樓梯會扑親.一望地下,即刻矇晒,原來平時我地係習慣就咁郁眼球去睇樓梯級的.戴漸變就要成個頭向下望,用鏡片上面既部份先得.仲有側面都係一樣,一定要成個頭轉過去,鏡片本身視角好窄.雖然咁多缺點,但同時睇到近景都係值得.不過………效果並唔係想像中咁直接.首先睇近視角更窄.例如睇枱面既文件,清既面積比卡片更小,因為文件係斜睇,卡片係垂直,要睇其他位置就要移個頭過去,有啲慢.打字更慘,原來除咗鏡頭有桶狀變形,眼鏡都有的.個鍵盤大肚不特止,由於我經常要又打英文,又打數字,變咗個頭要移來移去,原來睇近景一移個鍵盤會好似蛇咁彎一彎的.打得幾轉就有啲頭暈.平時用電話打機又係大肚,部電話側咗仲會變成平行四邊形…………仲有,原來同影相一樣,睇近嘢景深會比較淺.有時要花一秒半秒移個頭去對焦.搞到我真係好老人家咁………罷了,原來最先既方案先啱我.雖然睇近唔清楚,但其實都唔係好矇.仲認到鍵盤啲字,總好過變晒形又要花時間對焦.影相方面,我買咗條加長相機帶.雖然平時部機會吊得比較低…真係近到要除眼鏡呢?我發覺好型咁將個眼鏡撥去頭頂係好危險的.分分鐘跌落地又可以換款.反覆研究下,我覺得將眼鏡向下拉掛在鼻上係比較安全.依然有耳仔掛住.唉,搞咗咁耐都係得個桔.真係勞民傷財.算係買個經驗.希望老花唔好咁快變深啦,兩副眼鏡就真係冇計,要被逼戴翻漸變,徹底變成老人家架喇.　

寫到呢度又就快新年,祝大家發財,身體健康,永遠春青,鐡腳馬眼神仙肚.哈哈.

 

一搬再搬

搬到Blogspot一陣子,或許是我太電腦白痴吧,我見人地都冇乜問題的,但係我的網誌啲相出晒界,內容窄到好似一條線咁,留言又冇回覆話框,亂到……又有人成日留唔到言.

去信Goggle自然又係石沈大海,冇辦法只好又搵新地方.初初揀Blogspot除咗因為係大公司外,最重要係可以放大相.好多其他Blog都唔得,最近知道原來呢度都得,給了我很大希望,又要開始探索了,希望真的能安定下來吧.